فضفضه واحاسيس مبعثره..مشتركه بينا..

مساؤ ^_^
/

كيفكم ،

شكراً ميمي و يتيمة ، الله كريم .. ننتظر دام الانتظار لون يرتع فينا
بس الصراحة يا ميمي أكيد الأجواء هونيك غير مع هالجو الشتوي + المطر
شكلكم عشتوا أكشن .. هذي الأحلام الحين كل بـ ذيك الأجواء و بتحسي روحج كل مسافرة >>مثلي

،
يتيمة / وينج مختفية ، كيف أمورج ؟..
/
أم إلياس / نور المنتدى مختفية وين ، ليكون تلعب لعبة الغميضة
ايه ويش اللي مكرهني في الشتاء غير البرد اللي يكسر العظام >_< ،
مثلي يعني أحب الجو الربيعي لا فوق ولا تحت لو يصير الجو كل هشكل على مدار العام كان حركات
،
طيب أنا عندي سؤالين / نفتح باب النقاش مع أن المفروض توت و كرز
تفتح لينا قسم للحوار ، منشان هالمواضيع اللي بدل ما ناقشها هني تنقل لهونيك
/
- يقولوا المؤمن قلبه دليله ؟.. >> طبعاً أنا ما أدري كيف، و لا أدري هل قلبي دليلي أولا ؟..
شلون يعرف الواحد أن قلبه دليله لحد هلأ مو قادرة أفك المعادلة
ما أدري فهمتوا علىَّ ، يعني كيف الواحد يعرف أن الشيء اللي يفكر فيه فعلاً هو اللي يمكن يصير ليه ؟..

ما أدري ما عرفت أصيغ السؤال .. بس بالمختصر شلون يعني المؤمن دليله قلبه ؟
،
السؤال الثاني / كيف يفرق الواحد أن تفكيره
من العقل أو من القلب ؟.. شنو العلامات الفارق بينهم؟ ..
و خاصة إذا كان فيه صراع بين قلبه وبين عقله ، فـ تتشربك الخطوط و يضيع بينها ؟

/
إنسانة

مساء الخير للجميع ..

كيفكم ؟...
عيد غدير مبارك مقدماً .. ينعاد عليكم بالولاية
والسعادة
،/

الحوراء / كيفك ؟..

أيه شكله جذي ، بس وين ألقي هالمتخصص ذا
،
يتيمة / متباركة بالعيد
ينعاد عليك بالصحة / و السعادة
و إن شاء الله أنت بعد آخر عيد غدير تكون فيه لـ حالج
/
رورو / ألف مبروك لكم ، و عقبال عندج
نفرح فيج / و نزفج
،
طيب شخبار البقية الباقية ليش مختفيات
كل هذا شغل / أو زحمة ما بعد العيد
/
إنسانة/

مساؤ ..
كيفكم ،و الأخبار معاكم ؟..
أهم شيء النفسية لا تصير مؤشر بورصة مثلي ، يعني إن شاء الله مستقر
،
يتيمة ،/ هلا فيج أخبارج ؟،، مثل نجم سهيل ما نشوفج إلا في الدهر مرة
وين تروحي أنتِ ، شكلج رايحة مع حكاية بنفسج تلف العالم في يوم
ليش ما تأخذونا وياكم .. أو بالكثير بدنا نشوف الصور >> غصب هيه
/
دودة / الحمدلله على سلامة النت عندكم ..
كانت خبرتني عنه و أوريج فيه ، هذا كيف يخترب وما يعطينا خبر ،

مرة ثانية إذا فكر يخترب خبريني عنه و أوريه شغل الله >> ما عليج منها بس كلام ما تعمل شيء
/
حكاية بنفسج / و أخيراً طلعتِ ، شكلج خليتي بلوتو يفر فرة حول الشمس
وكنت تراقبيه ، و بعدين زهقج و جيتي ..
،
ويش كل هذا تجهزي لأجواء العيد ، شكلج مثل قناة الشرقية مأخذة أسبوع اجازة منشان هالعيد
النا راحت دواماتهم و هم [عيد و حب] >> اللي يسمعها كل متنقعة على الشرقية و هي ما تمره
إلا في السنة مرة يالله لا تغطي وايد لا أخصم من راتبج كله ، بس 10 ريالات فيالشهر >> مصروف كتكوت في الابتدائية
/
أم إلياس/
يالله من هلأ أحجزي للحج .. رغم أنهم يقولوا الحج السنة ما ينبغى
متعب بالحيل و كل اللي يجوا من الحج مرضى والحكومة مشددة ألعن من كل سنة>> شهالحالة .
.
بالنسبة للحاسة السادسة أغلب الأحيان تلاقيها تصيب ، وخاصة للناس اللي قوية عندهم عاد إذا ذاك اليوم عاملين تمارين تقوية .. الله يعين بس أهم شيء تنبؤاتهم عدلة أو اللي ذاك اليوم طافية على السطح نقول الله يجيب العواقب سليمة ..
بس إذا صار الواحد مشوش تلاقي ما تزبط عنده
يعني يبغى ليها صفاء روحي / و نفسي
بس تلاقيها عند بعض الناس تصير لعنة .. يعني ما تنفع ليهم
وخاصة إذا كانت تنبؤاتهم كل شينة ، حياة غيرهم تعتفس كل من تحت رأس التنبأ الشين..
طبعاً الكلام من شيء أنا شايفته
.
.
ترى أنت شكلج من النوع اللي يملكها ، يعني يبغى لج تصيري حذرة في تنبأتج
لا بعدين تخمني شيء عكسي و يبتلش إلا صابته
بدليل

اقتباس :

هوااااااااايوووه .. والله انتين في بالي وتوقعتش تجي وتبشرينا وصدق احساسي ..

عاد تنبأي لينا شيء عدل ،

الكلام عن الحاسة السادسة شيء ممتع ..
من فيكم تحس روحها تملك هذي الملكة ، تخبرنا كم مرة تنبأت بشيء و فعلاً صار
،
طيب كيف ينعرف أن القرار اللي أُخذ من العقل أو من القلب ، و يش هي الدلالات أهني أقصد أنا في السؤال ؟
كيف الواحد يفصل الحيرة / و الصراع اللي داخله ، بحيث بعدين ما يندم
و يقول كان اتبعت عقلي في حين المفروض أفكر بـ قلبي ؟
أو العكس ، بحيث ما يقع في الندم .. >> مو عارفة شلون أوضح السؤال أحسه معقد ..
/
بالنسبة للي شعرها الصراحة ضحكتني
فعلاً حرام ويش دخل شعرها ، يكسروا خاطري إذا سمعت أن واحد ما يبغى وحدة لأنها
مو بيضاء / أو لأنها مو طويلة أو أو .. أقول بيني و بين نفسي ويش دخل الحين أنت
بتتزوجها منشان شخصها أو منشان شكلها .. ويش هالتفكير

و بعدين إذا شعرها الحين مو عدل بكرة يعتدل ، و العالم تطور والمستحضرات غازية العالم
الحين السوداء فيها تصير بيضاء في ثلاث أيام و اللي شعرها ميت فيها تعمله
أنعم بـ ألف مرة .. يعني ما أنحبكت الأمور .. ليش التفكير السطحي ..

، فعلاً تلاقي
هالأيام تفكير الشباب ما أدري كيف بس يهمهم المظهر لا و قولي بعدين يندموا ، يعني هو بعدين ما استفاد إلا الهم ..
،
أنا هشكل بعد إذا تفكيره محصور بس في الطول و لون بشرته ومنشان مظهرها الخارجي بيأخذها ديركت يطيح من عيوني خله يستريح في بيت أهله،
لأن إذا من أولها تفكيره هشكل وين بعدين بنوصل يعني وقت ما يذبل جمالها بيروح مثلاً يدور غيرها
وإذا حبها وتعلق فيها بعدين بـ تصير ملكة جمال في نظره ..
هو صحيح الجمال شيء مطلوب ، بس مو لدرجة أن الوحدة تنرفض بسببه ، و هي مالها ذنب أن الله خلقها هشكل يسبب ليها عقدة نفسية ويحطم نفسيتها ..
،
الله يعين .. الأمور كلها بـ أيد الله
/
بالنسبة لسفرة أم البنين .. شكلج كذا .. عادي أعملي بسكويت صغار على عرض بصمة الابهام و بيكفي يعني كل وحدة تأخذ ليها واحد الكمية محدودة >> أمزح

إن شاء الله ما تطلعي من سفرة أم البنين إلا و حاجتج مقضية ..
،
هواي/ أيه يناسبج .. بس لا تكثري
لا نخلج تعمل أعمال شاقة ..

صحيح أني هالأسبوع ما شبكت ماسنجر ، بس حسيتج ما دخلتِ
و جاء في بالي كمبيوترج .. و الاستقبال الحار اللي استقبلني فيه أول ليلة
فديته والله .. شكله مثلج يتغلى / خجول ما يحب الناس الجديدة
،
يالله عاد خلج أهني / و نشوفج كل ثانية
،
بالنسبة للبنوتات البقية ، هلأ ما فينا نقول يجهزوا للعقد الجماعي لأن جاء محرم
فـ شكلهم يجهزوا منشان محرم ..
.
.
تدروا ما لي خلق السنة الجديدة ، ما أدري شفيني إذا أقبل شهر رمضان أتأزم
و إذا أقبل ذو الحجة أقفل ، وإذا هلت السنة الجديدة أتحطم .. >> شهالحالة
/
موفقين يا رب و الله يقضى حوائجكم بحق الحسين الشهيد
/
إنسانة

ضحكتيني
عاد تصدق هشكل أنا فعلاً ساعات كل شهر لي حالة شكل
عاد تدري المزاج هوائي ، يعني كل يوم على مود ، يعني لا تستغربي
يوم أجيج رايقة كول ، و في نفس اليوم جايتج النفسية تعبانة وبعد قولي داخل الشتاء
المزاج / النفسية مع تقلبات الجو يعني ما بيطلع الشتاء و أني مصدقة فيني روح
يعني الروح نص منهلكة ، منشان كذا ما ينفع وياي إلا الربيع
،
/
صحيح هي أرزاق ، بس بعد إذا هو مثلاً يبغاها بمواصفات معينة يحدد لأهله و هم بدورهم يخبروه قبل لا يتقدموا للبنت أنها هشكل و هشكل و هشكل،
منشان لا يحرجوا البنت / تدري البنت حساسة و أقل شيء يأثر عليها
ويحطمها ..

و حتى لو هم جميلين ، طيب هي مب ذنبها جمالها وسط
يعني تقتل روحها منشان تصير جميلة ، واللي مو جميلين خلاص يعني
يجلسوا بلا زواج هذي كلها نظرة المجتمع المختلفة ، و ساعات تلاقيها مالها شغل السالفة
أنها قسمة و نصيب أو أنها أرزاق ..

بس ضحكتيني يوم قلتِ [طيب يعني شتبي الحين وش دخلني فأخوتش]

ذكرتني بروحي ، أقل حاجة أقول يعني [و المطلوب مثلاً]

الجمال نعمة بس إذا كل الواحد شايف روحه / و عط فروقات بينه و بين
غيره منشان هذا الشيء تصير تكبر على الناس و تتحول لـ نقمة
يحمد ربه أنه حلو / وسيم >> أشوي و تقولي أشقر و طويل مثل زورو مثلاً

يالله الحلو الله يزيده حلاة ، واللي مب حلو اللي حليه ، يكفي روحه حلوة
/
بالنسبة للحاسة السادسة يالله تذكري شصاير لج من مواقف ..

أنا من النوع اللي عنده هالحاسة بس مو كل مرة مشغلة الخدمة
بس في الشتاء تأخذ ربع سبات و عائلتنا أغلبهم عندهم الحاسة السادسة ، بس أغلب تنبؤاتهم
شينة .. تقهرني
ويحليلهم إذا تنبؤوا شيء حلو ، يصير كأنهم البخت

،

اقتباس :

ترا معظم او يمكن أكثر التفكير يكون بالقلب والعقل مسكين

طيب شلون أفرق بينهم ؟

/
إنسانة